General Santos City–Hugot nga gipanghimakak karon sa usa ka Rajib Maulana Sagap alyas kadit 32 anyos ug nanimuyo sa Barangay Tambler ning syudad nga namaligya kini ug iligal nga droga human nga masikop kini sa gipahigayong buybust operation sa Police Station 3, alas 4:10 ang takna sa hapon sa Rivera St. Barangay Lagao ning syudad.
Sumala pa sa suspect nga natingala nalang kini nganong kalit lang siyang gipahapa sa mga pulis sa dihang mipalit kini ug sigarilyo sa tindahan nga wala man unta kiniy nabuhat nga sala.
Dugang pa sa suspect nga wala matud pay kamatuoran nga aduna kini transaksyon sa usa ka suspect nga una nang gidakop sa kapulisan ug wala matud pa kini gapamaligya ug iligal nga droga.
Samtang gikabutyag ni Police Major Peter Pinalgan Jr. ang hepe sa Police Station 3 nga lakip sa ilang watch list ang nasangpit nga suspect ug anaa usab kini sa watch list sa PDEA-12 hinungdan nga makonsidera nila kining dinagko kung mamaligya ug iligal nga droga.
Dugang pa ni Police Major Pinalgan nga Alibi nalang matud pa sa suspect nga na frame-up kini ug gihingusgan nga usa ka lihitimo nga operasyon ang ilang gibuhat, mas maayo matud pa nga sa korte nalang niini pamatud-an ang iyang mga aligasyon. (Dave Silagan)
