Director ug Project Manager sa DPWH XI, posibleng makasuhan kalabotan sa Shrine Hills project

Davao city –Gidut-an sa pagbasol sa Davao City Council ang Department of Public Works and Highways Davao Region sa nahitabo nga landslide sa Shrine Hills sa nakalabay nga semana.

Gihan-ukan sa pagtulisok sa Davao City Council ang DPWH XI tungod sa nasinati nga pagdahili sa yuta sa nasangpit nga area.

Girason ni Majority Floor Leader 3rd District Councilor Bernard Al-ag nga malikayan unta ang pagdahili sa yuta kung nakigkoordinar lang ang DPWH XI sa lokal nga kagamhanan una nagsugod sa road widening sa Diversion Road.


Gumikan sa landslide sa Shrine Hills, misantop sa hunahuna ni konsehal Al-ag ang pagporma og usa ka Kumitiba nga dad-on sa Committee on Public Works and Highway sa konseho.

Ang nasangpit nga Body Committee mao kuno maghatag og pagtugot sa DPWH XI kung kanus-a pwede sugdan ang ilang mga road project sa tibook siyudad sa Dabaw.

Dugang pa sa konsehal nga pwede kuno makasuhan ug mapriso sulod sa usa ka tuig ang Director ug ang Project Manager sa DPWH XI gawas sa multa nga lima ka libo ka pesos.

Apan giklaro sa Konsehal nga igo lang magrekumendar ang konseho ug ang penal nga paghukom anaa na kang Mayor Inday Sarah Duterte-Carpio kung iyaha bang kasuhan o dili ang mga opisyal sa nasangpit nga buhatan.

RadyoMan Joel Viray

Facebook Comments