General Santos City–Luwas na sa kuyaw nga kahimtang ang 18 anyos nga si Jayjay Malayon, nga taga Bo. Bla’an, Barangay Labangal, Gensan kansa driver sa motorsiklo nga nabangga sa pader sa may Diversion Road, Barangay Mabuhay, Gensan alas 11:25 ang takna sa gabie niadtong Hwebes.
Sumala ni Jeffrey Malayon, Ig-agaw sa biktima ug maoy kauban niini dihang sila nabangga nga naoperahan na ang nasampit ug nagpaalim nalang sa iyang samad nga naangkon.
Nasayran nga gumikan sa kakusog sa pagbangga sa mga nasampit sa pader grabeng samad sa iyang nawong ang naangkon hilabi na sa iyang mata.
Dugang saysay ni Jeffrey nga gikan sila sa balay sa iyang uyuan sa Barangay apopong ug pabalik na unta sa ilang gibatanyan nga luna sa Barangay Mabuhay.
Aminado usab kini nga sila hubog niadtong tungura. Sila gihawidan sa ilang uyuan nga dili nalang una mouli tungod kay nakainum namugos man ang biktimang si Jayjay nga mouli gyud sa ilang gitrabahuan.
Gani giangkon ni Jeffrey nga dawsa wala na sa saktong panimuot ang iyang ig-agaw samtang nagmaniho ug motorsiklo mao nga sila nabangga sa pader.
