Drug drop box gikabalak-an

Davao City – Gibutyag ni Ateneo de Davao University (AdDU) Political Science and History Professor Ramon Beleno sa interbyu kaniya sa tulumanong ‘Straight to the Point’ nga nabalaka siya sa mga posibleng atubangon nga problema kun mahitabo ang pagpatuman sa drug drop box.

Gisaysay ni Beleno nga sa paghatag og responsibilidad ngadto sa katawhan sa usa ka barangay sa pagbuntog sa iligal nga droga, gikinahanglang manubag usab sila kun kinsa man ang ilang gisumbong ngadto sa mga awtoridad.

Dugang pa sa propesor, mamahimong sagabal sa operasyon batok iligal nga droga ang pamaagi sa drug drop box sanglit kinahanglan pang iberipika o i-validate ang mga pangalan nga gipangbutang diha sa listahan nga mahulog unya sa maong mga drop boxes.


Gi-angkon ni Beleno nga ang pinakamaayong ‘source of information’ mao mismo ang mga katawhan sa barangay gumikan sila man ang labaw’ng nakahibalo sa mga katikaran sa ilang palibot apan malagmit magduha-duha lamang sa pagsumbong sa ilang nahibaw-an ngadto sa mga tinugyanan sa balaud.

Apan si Beleno usab nagpasidaan nga gikinahanglan nga kun mahinayon man kini nga istrahetiya, palig-onon pa ang accountability ug responsibility niadtong mo-alegar sa usaka salaud kontra sa usaka sibilyan o indibidwal aron dili kini maabusaran ni bisan kinsa lamang.

RadyoMan Jason Amisola

Facebook Comments