Dipolog City – Karong adlawa gilaumang kasuhan ang watch–listed drug personality nga nasikop sa gipahigayong buy-bust operation sa Philippine Drug Enforcement Agency (PDEA) Zamboanga del Norte Provincial Office, sa may Estaka St. Corner Exchavez St. Barangay Estaka, dakbayan sa Dipolog sa nakalabay’ng alas 2:00 sa hapon.
Giila ang dinakpan nga si Frangie Empasis Franca, 36 anyos, minyo, ug lumulupyo sa Purok Madasigon, Barangay Miputak ning dakbayan.
Kini human siya mapalitan ug usa ka pakete sa gituhoan shabu sa PDEA Agent nga nagpaaron-ingnon nga poseur–buyer sa kantidad nga P1,000.00 isip buy–bust marked money.
Nakompiska usab kaniya ang usa ka dakong pakete ug lima ka medium size sa pakete na gituhoan shabu diin gibana-banang motimbang sa 50 gramo nga may estimated value nga P300, 000.00 pesos.
Gihikay na ang kasong pagsupak sa Section 5 kon pagbaligya sa iligal nga droga ug section 11, Art II sa RA 9165 kon Comprehensive Dangerous Drugs Act of 2002.
Ang dinakpan temporaryong gibalhug sa Dipolog City Police Station. (r.m)
