Roxas City, Capiz- Nag-umpisa na subong nga adlaw sang Sabado, Nobyembre 23 ang pagpatuman sang one way traffic scheme sa pila ka karsadahon sa Roxas City.
Ginpahayag ni Mr Gonzalo Andrada sang Traffic Management Unit(TMU) nga ang amo nga ruta sang trapiko ang dati na nga traffic scheme sa diin nakapagkit sa section 7-C sang Ordinance No. 021, series of 2007.
Liwat nga igabalik ang one way traffic scheme sa corner Arnaldo Blvd./Tanque road lapos sa Tanque North Road/Caprichu II extension.
Subong man sa corner Datiles Street/Caprichu II extension padulong sa corner Datiles Street/Arnaldo Blvd.
Samtang ang gate sa likod sang Gaisano Mall ang pagabuksan para nga gamiton bilang exit para sa PUV kag mga pribado nga salakyan.
Ginsiling ni Andrada nga ini naman ang may pahanugot halin sa tagdumalahan sang nasambitan nga mall.
Ginpahayag dugang ni Andrada nga katuyoan sang nasambitan nga pagligwat sang ruta nga malikawan ang pagpugok sang trapiko ilabi na sa area sang Barangay Tanque, Caprichu II kag Datiles Street tubtob sa Arnaldo Boulevard.
Kadungan sini, naghenyo siya sang pag-intindi kag kooperasyon sang mga motorista sa pagpatuman sang dry-run.
📷RadyoMaN Roger Garcia
