Arestado ang duha ka mga babaye matapos nga nakuhaan sang duha ka granada kag druga kadungan sang ginapatigayon nga checkpoint operation sang kapolisan sa Sitio Spring, Brgy. Poblacion, Tboli, South Cotabato.
Base sa report sang T`boli MPS, alas 10:30 kagab-i, Hunyo 21, 2021 sang ginpapondo ang ginasakyan nga habal-habal sang duha ka mga babaye, apang nangin arogante suno pa ang mga ini, matapos nga wala sang picture kag ginadudahan nga indi nila matuod nga pangalan ang nakabutang sa ila nga CCTS card.
Nakita ang duha ka granada sa bag sang mga ini kag isa ka sachet sang shabu nga may kabug-aton nga 0.015 gram nga nagakantidad sang P500.00 sang ginsikyar ang ila nga bag.
May-angot sini, gilayon naman nga gin-aresto ang duha nga ginkilala sa matuod nga pangalan nga sanday Kristine Bansawan Kala (aka Analyn Danian), 22 – anyos kag Carla Lasib (aka Mary Jane Sulan), 20- anyos, pareho residente sang Colonsabac, Matanao, Davao Del Sur.
Ginkustodiya naman sa T`boli MPS ang duha kag pasakaan sang nagakaigo nga kaso.
