Duha ka konsehal, pabor nga himuong mandatory ang pagsul-ob ug face shield sa mga pampublikong sakyanan

General Santos City–Dakong pabor ang duha ka konsehal sa Gensan nga himuong mandatory ang pagsul-ob ug face shield ilabi na kadtong mga pasahero nga mosakay sa mga pampublikong sakyanan.

Nasayran nga base sa kamanduan, petsa 15 sa Agosto i-implementar na ang pagsul-ob ug face shield sa tanang mga mosakay sa pampublikong sakyanan sa nasud.

Pamahayag ni city councilor Lourdes Casabuena nga maayo ang gihimong lakang sa gobyerno nga obligahon gayud ang tanan nga musul-ob ug faceshield tungod sa padayong pagtaas sa kaso sa covid 19 sa nasud aron mapugngan ang pagkuyanap sa maong virus.


Samtang sa kabahin usab ni City Councilor Atty. Jeng Gacal, Chairman sa Kometiba sa transportasyon sa konseho nga pabor kini sa nahimong lakang karon sa gobyerno.

Ang pagsul-ob ug Face Shield, makahatag matud pa ug dugang proteksyon sa katawhan gumikan niining padayong bahad sa covid 19.

Positibo usab ang konsehal nga himoong mandatory ang pag sul-ob ug face shield gawas sa facemask sa tumong nga aron maprotektahan gayud ang panglawas batok sa makamatay nga virus ug mapugngan ang pagkuyanap niini.(RV)

Facebook Comments