Sikop sa mga kapulisan dinhi sa dakbayan sa Iligan ang duha ka mga suspetsado nga gi alegar nga mi- rape sa usa ka menor de edad alas nueve kapin kun kulang ang takna sa gabie diha sa may C3 sakop na sa Barangay Palao ning dakbayan sa Iligan.
Ang mga suspetsado nailang si Aryan Amni 33 anyos, ulitawo, driver, taga Fuentes sakop sa Barangay Maria Cristina ning dakbayan samtang laing suspetsado nga usa ka menor de edad nga taga purok 5 Barangay Tambacan ang kauban nga gisikop sa tinugyanan sa kapulisan human gi alegar nga mirape sa usa ka menor de edad nga itago sa alyas “Joy” taga purok 4 Barangay Buruun ning dakbayan sa Iligan.
Sumala pa, nga gipick-up sa maong mga suspetsado ang biktimang babae diha sa usa ka imnanan sa De Leon corner Labao Street ug sanglit wala na siya’y mga ginikanan mikuyog ang maong babae paingon sa ibabaw nga bahin sa C3 sakay sa usa ka bonggo nga sakyanan ug didto nahitabo ang ilang pag pot session .
Sa dihang lango na sa illegal nga droga, gi lugos matud pa ang menor de edad sa maong mga suspetsado apan dihang nakahigayon kini nga maka eskapo, nakapangayo kini ug tabang sa kapulisan.
Na recover sa maong lugar ang pipila ka sachet sa shabu ingon man mga drug paraphernalia ingon man ang sakyanan nga Bongo nga gigamit sa mga suspetsado.
Lakip usab nga gisikop ug gibalhog sa kapulisan sa station 5 ang maong babae sanglit miangkon kini nga apil sa migamit ug ginadiling droga.
Gitakdang pasakahan kini sa tukmang kaso ang maong mga dinakpan nga paglapas sa RA 9165 o Comprehensive Dangerous Drugs Act ingon man kasong paglapas sa RA 8353 o Anti-Rape Law gumikan sa kasong pagpanglugos.
