Patay ang duha ka lalaki human matud pa misukol sa gipahigayong drug buy bust operation sa mga ginsakpan sa Tagoloan Municipal Police Station mga alas sais kapin kon kulang kagabie sa Casinglot, Tagoloan, Misamis Oriental.
Naila kini nga silang Albert Dingcal hingkod ang panuigon taga Casinglot, Tagoloan ug John Mark ‘Dodo’ Maglacion, hingkod ang panuigon taga San Vicente, Tagoloan.
Human sa maong insidente gilayon kini silang gipangdala sa St. Paul Hospital sa Tagoloan apan patay na.
Sa initial nga imbestigasyon sa SOCO 10 gibutyag ni Police Lieutenant Pauljean Ragmac nga tag-upat ka samad pinusilan ang naangkon niini tag duha sa dughan ug likod.
Gikabutyag usab nga nakuha sa crime scene ang usa ka .38 nga armas nga adunay upat ka misfired nga bala ug usa ka buhi nga bala ug nakuha usab ang usa ka granada.
Nakuha usab sa bulsa ni Dingcal ang nagkadaiyang yabe, doublemint nga canister nga dunay sulod gitoohang shabu ug 500 pesos nga buy bust money samtang nakuha usab sa bulsa ni Maglacion ang tictac canister nga dunay sulod gitoohang shabu.
