Duha ka motorsiklo nagbangga, 1-patay

24

General Santos City–Gikumperma ni Police Major Yul Hilado ang Deputy Chief sa Traffic Management Unit (TMU) nga anaa gayud sa empluwensya sa ilimnong makahubog nga nagmaniho sa iyahang motorsiklo ang biktimang si Wiljohn Canoy, 21 anyos nga nanimuyo sa Changco Phase 1-A, Barangay Bawing ning syudad sa dihang nahitabo ang pagbangaanay nila sa laing motorista nga si Genesis Juales, 36 anyos nga nanimuyo man usab sa barangay bawing ning syudad.

Sumala pa ni Major Hilado nga basi sa imbistigasyon kusog matud pa ang padagan ni Canoy sa iyahang motorsiklo padulong sa Siguel sa dihang kalit lang mi u-turn nga walay tan-aw sa dalan si Juales hinungdan nga nabangaan kini sa naghaguros nga si Canoy.


Parehong nakaangkon ug samad sa ilahang kalawasan ang mga biktima apan si Canoy ang naka-angkon ug mas grabe nga samad sa iyahang lawas hinungdan nga human ang pila ka oras nakabsan kini sa iyahang hinulamang kinabuhi.

Sa karon ginapaabot nalang sa kapulisan nga mahidangat sa ilahang opisina ang mga kabanay sa namatay nga si Canoy aron usab sayron kung magpasang-at kini ug reklamo batok nabangaan niini.

Samtang gihingusgan usab ni Hilado nga ang PNP ang wala nagkulang sa pag pahimangno sa mga motorista nga kanunay gayud mag maampingon panahon nga mugunit ug manubela tungod kay ikaw ang mamahimong responsible sa imong kinabuhi ug sa imohang mga pasahero.(Dave Silagan)

Facebook Comments