Duha ka pagpamusil nahitabo sa managlahing lugar sa Gensan

General Santos city—duha ang patay sa sunod sunod nga pagpamusil sa managlahing Barangay sa Gensan.

Unang gipusil patay sa riding in tandem ang biktimang si Guillermo Pendatun, 44, residenti sa Alikan, Malungon, Sarangani Province alas 4:20 ang takna sa hapon kagahapon , Mayo 15, 2017 sa Prk. 8, Barangay Fatima Gensan.

sa inisyal nga imbistigasyon sa Police Station 7 ngadto sa crime scene, nga igo lang nag paayog sakyanan ang biktimang si Guillermo uban sa iyang amo nga si Erlinda Pronting, Negusyante.


Kalit lang miabot ang duha ka mga lalaking sakay sa motorsiklo dayon gipusil ang biktima pila ka higayon nga hinungdan sa iyang kamatayon. Paspas nga misibat ang suspek human sa insidenti samtang ang biktima, Wala na nadala pa sa balay tambalanan human nakabsan gilayon sa iyang kinabuhi.

Gikaingong nailhan sa witness nga si Erlinda nga usa ka Hamsa Abas nga taga Upper London, Barangay Bawing ning dakbayan ang usa sa duha ka suspek sa krimen. Padayon pa usab ang gihimong imbistigasyon sa kapulisan kalabutan sa insidenti.

Sunod nga gipusil patay ang biktimang si Paterno Alumbro, nga tagaBarangay mabuhay ning dakbayan. Alas 5:35 ang takna sa hapon sa samang adlaw dihang gipusil ang nahisgutang biktima sa duha ka mga suspetsadong nakamotorsiklo.

Nakaangkon ug samad sa nagkandaiyang parti sa kalawasan ang biktima nga hinungdan sa iyang kamatayon.

Paspas nga nanibat ang mga suspek human sa insidenti. Nasayran nga igo ra untang muhimo ug payag ang biktima uban sa iyang mga kaubanan sa bakanting luna nga iyaha sa Monte Cielo sa Malayang nayon, Barangay Mabuhay dihang nahitabo ang pagpamusil.

Usa sa mga anggulong gitutukan sa otoridad sa pagpusil kang alumbro ang kalabutan sa Komplekto sa Luna kansa gibutyag nga adunay nag ilog sa luna nga gipanag-iyahan sa Monte Cielo.

Facebook Comments