Roxas City, Capiz – Magapangatubang sang kaso nga paglapas sa RA 9165 ukon Comprehensive Dangerous Drugs Act of 2002 ang duha ka mga persona nga nadakpan sa drug buy bust operation sa syudad snag Roxas.
Arestado ang isa ka dancer kag ex-convict sa ginkasa nga operasyon sang mga katapo sang Station Drug Enforcement Team(SDET) sang Roxas City PNP sa Barangay 2, sining syudad.
Nakilala ang subject person kay Elmer Duran y Fabiaña, 35-anyos ang pang-edaron sang Ellieta Street Barangay Banica, Roxas City kun sa diin narekober sa iya posesyon ang apat tanan ka sachet sang ginasuspetsahan shabu, P500 nga marked money, isa ka unit sang cellphone kag pouch.
Nahibaluan nga napreso na si Durana sang tuig-2006 matapos nga nadakpan man bangud sa ilegal nga droga kag sang tuig-2011 lamang nakaguha sa presohan.
Samtang, liwat man nga naarestar ang 27-anyos nga persona sa ginkasa nga drug buy bust operation sang mga katapo sang Provincial Drug Enforcement Unit (PDEU) sang Capiz PPO pasado alas sais sang gab-i sa Barangay Banica, Roxas City.
Ang subject person ang ginkilala kay Dharyl Antonino y Sandoval nga isa ka traysikol drayber kag residente sang Mission Hills, Barangay Milibili sining syudad.
Natigayon nga makuha sa iya posesyon ang 23 tanan ka sachet sang ginasuspetsahan shabu, marked money, cellular phone kag ginasakyan sini nga traysikol.
