Nakalockdown sa subong ang duha ka mga purok sa Brgy. Cabuling sa banwa sang Tantangan, matapos nga nagpositibo sa coronavirus ukon COVID-19 ang isa ka fish dealer sa nasambit nga banwa.
Suno kay Tantangan Municipal Health Officer Dr. Renato Ureta ang duha ka mga purok nga ginlockdown amo ang Purok Pag-asa kag Paglaum sang nasambit nga barangay agud nga mahatagan suno pa ligwa ang nagapadayon nila nga contact tracing.
Nahibaluan nga naggwa ang resulta sang RT-PCR test sang 38-anyos nga fish dealer nga may history of exposure sa Gensan fish port sang Setyembre 2.
Ginkumpirmar ni Dr. Ureta nga paagi sa ila nga inisyatibo nga ginpaidalom sa rapid test ang tanan nga fish dealer kag vendor sa banwa nga nagalakat sa Gensan fish port nahibaluan nga nagpositibo ini sa rapid test kag gilayon nga ginpaidalom sa RT-PCR test.
Sa subong suno sa municipal health officer yara naman sa maayo nga kondisyon ang nasambit nga pasyenti kag padayon nga nakaisolate.
Apela niya naman sa tanan nga mga pumuluyo sang banwa nga kon wala sang importante nga laktan ang magpamuyong na lang kag ipatuman gid ang mga health protocols kapareho sa pagsuksok sang facemask kag faceshield kag iban pa.
