Duha ka sabungero preso

46

Davao City — Napaslak karon sa selda sa Bunawan Police Station ang duha ka sabungero human akto nasapon sa mga kapulisan samtang nagtari sa suok nga dapit sa Gawad Kalinga, Tibungco bandang 1:30 sa hapon sa adlaw’ng Domingo.

Giila ang mga dinakpan nga mao sila Cyrell Empeyenado, 41 anyos, nagpuyo sa Purok 2-A, Barangay Ilang, ug si Joel Purisima, 43 anyos, residente sa Purok 3, Tibungco ning dakbayan.


Sumala ni Police Major Noel Villahermosa nga nakadawat sila og impormasyon gikan sa mga residente sa lugar nga dunay panagtapok sa mga kalalakin-an nga nagpasabong sa hilit nga bahin sa maong dapit.

Busa gilayon gimandaran ni Villahermosa ang iyang mga ginsakpan sa paglusad og operasyon kontra iligal nga sugal hinungdan nabulabog ang sabong ug paspas nakasibat ang mga sugarol gawas nila Empeyenado ug Purisima kinsa wala dayon makadagan niadtong panahona resulta sa ilang pagkasikop.

Kalapasan sa Illegal Cockfighting ug pagsupak sa kwarantina ang atubangon nga kaso sa duha kung asa idulhog na karong adlawa ang asunto sa hawanan sa piskalya.

RadyoMaN Joel Viray




Facebook Comments