Duha nadakpan sa PNP-Checkpoint pagpayuhot sa illegal nga droga; Dol-an 400 mil ka pesos nga kantidad sa shabu, nakompiska

30
Himas-rehas ang duha ka mga suspetsado human nga naharang sa mga kapulisan atol sa gipahigayong checkpoint diin nakompiskahan og dol-an 400 mil ka pesos nga kantidad sa ginadiling drogang shabu pasado ala 1:15 kagahapon sa kadlawon didto sa RMFB 10, Patrol Base, Purok 2, Bangbang, Kalilangan, Bukidnon.

Giila ang mga suspek nga silang Dondon Kinumpas Tangcas, 21 anyos, ulitawo, estudyante, ug residente sa Purok-2, Central Poblacion, Kalilangan, Bukidnon ug Monalisa Tauna Tangkal, 48 anyos, balo, ug residente sa Membuaya, Wao, Lanao Del Sur. Sumala sa taho nga nasita sa mga pulis ang maong mga suspek human wala nakasuot sa protective helmet, didto na nadiskobre sa mga operatiba nga nagbaton og mga ginadiling droga ang mga suspek nga sa karon gikustodiya na sa kapulisan.

Narekober sa posesyon sa mga suspek ang mutimbang sa 55 gramos nga drogang shabu lakip ang mga nagkadaiyang drug paraphernalia ug usa ka unit sa Kawasaki Bajaj nga single motor.

Gidala sa Kalilangan Municipal Police Station ang mga suspek samtang giturn-over sa Bukidnon Provincial Forensic Unit, Malaybalay City alang sa eksiminasyon.

Kasong paglapas sa RA 9165 kon Comprehensive Dangerous Drugs Act of 2002 ang mga dinakpang suspetsado.

Facebook Comments