Duha nga barangay officials, ginpamumusil

640

TACLOBAN CITY – Ginpamumusil han riding in tandem an duha nga barangay officials ha Brgy. Bayho, Lope De Vega, Northern Samar, alas 2:50 han kulop, kasangkulop.

Basi ha report han Police Regional Office 8, ginkilala an mga biktima nga hira Benadio Tonog Laurian, 44 anyos, may asawa, usa nga brgy. kagawad ngan hi Edwin Lauriano Teopinto, 44 anyos, may asawa, usa nga brgy. Chairman ngan residente hira nga duha ha Brgy. Somoroy han nasabi nga bungto.

Ha nagawas nga inisyal nga imbistigasyon han mga otoridad, sakay hin motorsiklo an duha nga biktima samtang ginbabaybay an kakalsadahan han Brgy. Bayho matapos hira umatinder hin Christmas party ha Brgy. Poblacion.

Tigda nala umabot an mga suspek sakay hin duha nga unidentified motorcycle ngan ginpa-uranan hin bala hin pusil an mga biktima gamit an short firearm ngan unidentified caliber.

Patay hi Brgy. Kapitan Edwin samtang padayon nga gintatambal hi Kagawad Benadio.

Naka-angkon hin magkadurudilain nga igo hin pusil an mga biktima.

Ha pagka-yana, padayon nga nagdudumara hin hot pursuit operation an mga otoridad para mabilngan an mga suspek.

Ginpapanginano na gihap yana han mga imbistigador kun ano an motibo han mga suspek hini nga krimen.

Facebook Comments