Duha patay sa shooting incident sa Barangay Taculing

138

Patay ang isa ka 20 anyos nga lalaki matapos nga nasalabat sa pagpangluthang sa Purok BM, Barangay Taculing, ciudad sang Bacolod, Sabado sang gab-i, Hulyo 25, 2020.

Ginkilala ang biktima kay Dean Mar Suspeñe, residente sang nasambit nga lugar.

Sa pagpang-usisa sang RMN News, naga inom ang si Patricio Suspeñe, amay ni Dean Mar sa ila puluy-an upod sang mga abyan sini nga sanday Noel Valencia kag Tomas Divino.


Hinali na lang nga may lalisay nga natabo sa tunga nanday Noel kag Tomas. Nagpauli si Noel para magkuha sang binangon samtang si Tomas ang nagkuha man sang armas-luthang sa ila balay.

Pagbalik sang duha didto na nga ginhanaan ni Noel sang binangon si Tomas kag tuyo nga labu-on apang gintambagan ini ni Dean Mar.

Didto na kag nagpalupok sang armas si Tomas kag naigo si Noel samtang nasalabat naman si Dean Mar. Igo sa ulo ang naangkon sini rason sang iya hinali nga kamatayon.



Ginhingagaw pa dala sa ospital si Noel apang ginbawi-an man sang kabuhi.

Pilason man sa insidente sanday Ranuel kag Jojo nga upod man sang mga biktima.


Padayon karon ang imbestigasyon sang otoridad. Nagpalagyo naman si Tomas matapos ang krimen. (RMN photo)

Facebook Comments