HIMAMAYLAN CITY, Negros Occidental – Duha ang patay samtang 9 ang pilason sa head on collission incident sang isa ka truck kag trisikol sa Barangay Talaban, syudad sang Himamaylan las 7:45 subong nga gab-i, Mayo 9.
Pilason ang driver sang truck nga ginkilala sa kay Dario Pontino, 34 anyos, residente sang Barangay Blumentritt, banwa sang Murcia, kag kaupod sini nga sanday Roy Dagui, 40 anyos kag Danny Boy Sanny, 20 anyos, lunsay pumuluyo sang syudad sang Bacolod.
Nasamaran man ang driver sang trisikol nga si Kevin Jade Montaño, 23, kag mga pasahero nga sanday Jerick Orbena, 18, Rema Rose Flores, 15, Robert Porras, 19, Lorenz Gabriel, 17 kag Paloma Grande, 16.
Ginkilala naman ang napatay nga sanday Faith Joy Hontiveros, 15 anyos kag Joshua Valdez, nga lunsay sakay sang motorsiklo sang matabo ang aksidente.
Sa pahayag ni Lt. Col. Ervin Provido sang Himamaylan City PNP, padulong sur ang trisikol samtang pabalik naman sa Bacolod ang truck.
Suno sa mga nakakita, nag-overtake ang trisikol sa isa pa ka truck kag hinali na lang nga nadulaan ini sang kontrol rason nga wala ini makabalik sa iya lane kag nakabunggo sa pasugata nga truck.
Magapauli na kun tani ang mga pamatan-on nga sakay sang trisikol matapos mag-practice saot.
Nahunong karon sa custodial facility sang Himamaylan City PNP ang driver sang truck. Ginpangdala naman ang mga nagkalapilasan sa ospital para sa nagaka-igo nga pagbulong. Photo by Binalbagan LDRRMO /IFM NEWSROOM/RCSG
