Sarangani Province- Opisyal ng gipaila og gitudlo sa probinsya sa Sarangani ang dula nga Wrestling. Kagahapon, Dominggo, natapos ang tulo (3) ka adlaw nga pagpahigayon og ikatulong hugna sa Sarangani Provincial Sports Summit nahitabo sa lungsod sa Kiamba, diin nahimong hisgutanan ang dula nga Wrestling.
Pirti kalingaw sa mga kabataan sa Sarangani nga nagtuon sa Wrestling sa dakong hawan nga baybayon sa Kiamba.
Nahimong trainor ang mismong assistant head coach sa Philippine Wrestling Team gikan pa sa kauluhang Maynila nga si Erwin MariƱas, katugbang ang player-trainor nga si King Brian Ross Guingona.
Sila ang gidala ni Attorney Jolly Gomez, ang kanhing commissioner sa Philippine Sports Commission og karon sports adviser ni Sarangani Governor Steve Chiongbian Solon.
Segun ni Board Member Bobot Martinez, ang provincial sports coordinator, may pasiunang training na sa Wrestling gipatigayon niaging bulan sa Hunyo sulod sa Capitol Gym sa Sarangani apan kadto usa lang ka adlaw.
Si Emil Logarta, Grade 11 sa Kiamba National High School, dugay ng magdudula sa Taekwondo, ang nagbutyag nga maayo matud pa ang Wrestling, dili parehas sa ilang nakita sa TV nga nagbinulanay og nagpinuspusay ang mga partisipante. Dili kuno delikado ang pagdula tungod kay gitudluan sila unsaon pagkuhag puntos og ang sakto nga pagpatumba sa kalaban.
Samtang, matud sa baynte-dos (22) anyos nga player-trainor nga si Guingona, dili gikinahanglan nga puros kusog ang gamiton sa Wrestling, mas bug-at matud pa nga gamiton ang utok aron maka-diskarte maka-puntos og ang pagkugi panahon sa mga pagbansay.
Sa bahin ni Assistant Head Coach MariƱas, iyang gipaniguro ang safety sa mga atleta.
Nagpasalamat si Attorney Gomez ngadto ni Governor Solon kauban sila Senador Manny og Congressman Ruel Pacquiao, Vice Governor Elmer De Peralta, mga board member og ang pito ka mga mayor tungod sa pagtutok sa grassroots sports development program, sigurado matud pa ang mas nindot nga kaugmaon sa mga kabataan sa Sarangani Province.
Gawas sa Wrestling, nagpahigayon pud og sports clinic para sa mga dula nga Sepak Takraw, Sotfball og Futsal.
