DXDC Exclusive: Nag-viral nga dalagitang na-missing giklaro ngadto kang Mayor Baste nga wala kini gi-kidnap

Davao City – Gitagbo ug personal nakig-istorya si Davao City Mayor Sebastian Duterte sa dalagita kinsa gikatahong na-missing kauban ang iyang pamilya aron maghatag og katin-awan sa publiko sa alegasyong kidnapping incident.

Gipasabot sa dalagita ngadto sa Mayor nga wala kini gikidnap sukwahi sa mga nikatag nga mga impormasyon sa social media.

Kahinumduman, nidangop sa kapulisan ang inahan sa dalaga tungod wala na kini niuli sa ilang balay sukad niadtong nibiya kini alas 5:30 sa hapon Agosto 24 adlawng Miyerkules.

Naalarma ug nabalaka na ang pamilya ug mga higala sa dalaga sa nag-viral nga ulahing post niini nga nangayo’g tabang.

Gibutyag sa dalaga nga aduna siyay katagbo ug nakauban niadtong higayona apan tungod sa kahadlok nag-post kini sa iyang facebook account.

Alas 8:30 sa gabii (Agosto 25), adunay impormasyon nga nakita ang dalaga didto na sa Luna Extension, Digos City, Davao del Sur.

Nakig-alayon si Police LTCol. Ronald Lao, Sta. Ana Police Station Commander ngadto sa kapulisan sa Digos ug gisundo na ang dalaga sa iyang pamilya pauli og dakbayan sa Davao.

Nangayo’g despensa ang dalagita sa Mayor ug nagpahimangno usab sa uban nga aron walay susamang insidenteng mahitabo kanila dili magkumpyansang makigkita sa bisan kinsang mga tawo.

RadyoMaN Aimee Guinita

Facebook Comments