Lezo, Aklan – Eantas gid rong waeang alima it biktima matapos nga eab-on kabii sa Brgy. Ibao, Lezo, Aklan.
Ro biktima nakilaea kay Rodulfo Crispino, 61-anyos residente it nasambit nga lugar samtang rong suspek nakilaea kay Sonybert Fereira, 39-anyos ag residente it Brgy. Aliputos, Numancia.
Suno kay SPO3 Marcial Tolentino it Lezo PNP nga kabii mga alas 7:30 ro oras hay nakabaton sanda it tawag nga may natabong pagpang eabo. Insigida nag responde sanda ag pag-abot sa lugar ro biktima hay hadaea eon sa hospital.
Sa imbestigasyon nanda naga guwa nga rayang bikitma kaibahan sanday Manny Tonel ag ro anang umagad hay naga inum-inum sa prente it baeay nanday Manny, umagi ro suspek nga naga pauli eon halin man sa anang igbata sa Ibao hay anda nga ginsumbilan it inum ugaling nagpamalibad rong suspek ay matsa nakainum man eon.
Sa pagbalibad it suspek hay naghinambae pa raya it mga maeain nga tinaga ag may natabong diskusyon kung sa siin gulpi gumabot it sanduko ro suspek ag linabo ro biktima nga sinagang na ko anang waeang alima nga naging dahilan ko pagka utod.
Na recover sa area rong waeang alima it biktima nga ginpaapas eagi sa hospital pero uwa eon raya natigayon nga masugpon.
Sa makaron hay padayon nga gina bueong rong biktima sa Aklan Provincial Hospital samtang rong suspek hay nagapabilin nga at-large.
