Ibajay,Aklan –Dead on the spot rong sangka eaeaki matapos nga masunggaban it daywa ka mga saeakyan sa national highway kung Brgy. Naisud, Ibajay kabii.
Ro biktima nakilaea kay Ronald Magsael y Tipasi, 35-anyos ag residente man it nasambit nga lugar.
Sa pakikipag-angot it RMN Kalibo kay PO1 Donald Alvarado it Ibajay PNP nga kabii hay nakabaton sanda it report nga may unang natabong aksidente sa lugar ag insigida nga gin respondehan.
Sa andang pag-abot sa lugar, naabutan ro biktima nga nagahamyangon sa tunga it karsada ag pusa rong ueo.
Sa imbestigasyon naga guwa nga rayang biktima hay temprano pa eang hilong eon ag kabii samtang nakapanikangon pauli sa anda hay aksidenteng hasunggaban it sangka kotse nga Nissan color silver ag ginamaneho it sangka babaye nga paadto sa direksyon it Poblacion Ibajay.
Matapos sunggaban ro biktima inapok imaw paadto sa likod nga parte it kotse ag haligsa pa gid dayon it naga sunod nga sangka wing van.
Sa makaron hay una eon sa kustodiya it Ibajay PNP rong driver it kotse nga naghinyo man nga indi eon pagpangaeanan ag ginahueat ro pamilya it biktima kung ano ro disposisyon samtang rong gina usoy pa man makaron rong driver it wing van bangud nga uwa raya mag pundo matapos sunggaban man ro biktima.
