Davao City – Sa katuyoan nga dili mahugawan ang imahe sa nasudnong kapulisan ug armadong kusog sa Pilipinas diha sa publiko, gisugyot karon sa Eastern Mindanao Command (EASTMINCOM) nga mas maayong dunay Memorandum of Agreement (MOA) nga mahiusahan ang mga TV networks ug PNP o dili ba kaha AFP alang sa salida kun teleserye nga i-portray kung asa unod ang character sa mga men in uniform.
Sumala ni Eastmincom Spokesperson Lt. Col. Ezra Balagtey, importante kaayo nga dunay MOA tali sa mga tv networks ug gobyerno kay magsilbi kini nga giya sa pagtampuhanay og ideya sa pagmugna og teleserye nga maghisgot sa kinabuhi ug trabaho sa kapulisan o dili ba kaha sa kasundalohan aron dili mu-gawas nga dautan sa mga manan-awan ang mga otoridad.
eigun ni Balagtey nga bisan pa og gipangatarungan sa tagdumala sa usa ka giant tv network nga fictitious ang mga character sa tulo na ka tuig nga teleserye apan sa ngalan nga tinuod nga uniporme sa pulis ang gisuot sa mga naglangkub sa salida, maghatag gihapon kini og kadaut ngadto sa mga awtoridad.
Gi-uyonan sab sa tigpamaba sa Eastmincom ang pag-alma ni PNP Director-General Oscar Albayalde sa teleserye nga naghulagway sa binuang ug krimen sa kunohay presidente ug sa mga kaalyado diin ang Chief PNP nagkompromiso ug nakigkonsabo sa dautang binuhatan sa tag-as nga mga opisyales.
Alang ni Balagtey, ang nasangpit nga teleserye magpahugaw sa hunahuna sa kadaghanan hilabi na sa kabataan ug mugawas nga mao diay dunay mga nagrebelde tungod sa dautang buhat sa mga opisyales sa gobyerno.
RadyoMaN Joel Viray
