ECPC SARANGANI NAKATALA OG MAS LABING DAGHANG MIGRATORY RAPTORS KARONG TUIGA

9

Nitala og mas labing daghan nga migratory raptors ang nanglupad sa kawanangan sa Glan, Sarangani Province karong tuiga ikumpara sa nanglabay nga mga tuig. Kini ang gikumpirma ni Doctor Roy Mejorada, ang in-house veterinarian sa ECPC kon Environmental Conservation and Protection Center ilalum sa superbisyon ni ECPC Executive Director Kido Ramirez ubos sa buhatan ni Governor Steve Chiongbian Solon.

Sa pag-monitor sa ECPC gikan Septembre 19 hangtud atong Sabado, Oktubre 5, niabot na sa 139,993 kabuok mga migratory raptor ang ilang sayantipiko nga naihap. Mulungtad ang ilang pag-monitor ug pag-ihap hangtud pa sa Oktubre 30.


Atong tuig 2016, nakatala ang ECPC og 78,000 kabuok mga langyaw nga banog. Pagka-2017, niabot sa 130,000 ka mga migratory raptor ang nangagi. Niaging tuig 2018, niabot og 105,000. Ug karong tuiga, anaa na sa 139,993 kabuok migratory raptors ang nagpakita bisan wala pa nahuman ang monitoring mulungtad pa hangtud Oktubre 30.

Nagsugod ang pormal nga pagtuon sa ECPC Sarangani kabahin sa migratory raptor atong tuig 2016 kauban ang Raptorwatch Network Philippines. Apan unang nag-survey sa area atong tuig 2014 ang Raptorwatch Network Philippines sa pagpanguna sa abogado nga environmentalist nga si Atty. Alex Tiongco kuyog ang ECPC kung diin hapit pa sila naabot sa probinsya sa Davao Occidental sa pagpangita sa ruta sa mga langyaw nga banog.

Halos kwarentay-singko (45) ka adlaw matag tuig ang ginapatigayon nga pagtuon sa ECPC gikan ikatulong semana sa Septembre paingon Oktubre. Mao kini nga mga adlaw nga gaabot ang mga migratory raptor gikan pa sa Japan, Taiwan, China apil na ang pipila ka mga lugar sa Russia. Gaagi sila sa Pilipinas unang entry sa Northern Luzon ug mulusot sila sa Glan una mupadulong sa Indonesia apil na sa Papua New Guinea ug New Zealand. Gihimo nilang roosting site aron makapahuway ug makapangitag pagkaon ang bukid ug kalasangan nga bahin sa Mount Taltak, Mount Gulo ug ang katapad nga Mount Latian Complex.

Sulod sa maong 45 days study period sa ECPC, ginasabayan pud kini sa pagpahigayon og raptor watch festival aron apil nga makakita ang mga katawhan. Walay laing katuyuan kundili nga masilsil sa alimpatakan sa mga kabataan ug residente nga anaa silay pirmeng bisita apan dili pasakitan tungod sa dakong tabang niini nga pagbalanse sa kinaiyahan.

Ug tuod man, nahimong naglampuson ang 2nd Raptor Watch Festival atong Oktubre 2. Si Ace Glen Panes, taga-Awang, Cotabato, kauban ang iyang higala taga-Surallah, South Cotabato, kuyog pud si Batulaki Glan Barangay Kagawad Ramil Avenido, ang personal nakasaksi sa mga migratory raptor. Nakita nya matud pa ang nagpanon sa kalangitan bisan wala na kini mugamit og teleskopyo. Iya matud pa kining ipamalita sa iyang mga kababayan sa Cotabato aron sila usab ang personal makakita sa pinasahing turismo sa Sarangani Province, eco-tourism nga gimugna mismo sa Ginoo.

Nitambong sa 2nd Raptor Watch Festival sila Governor Solon ug kapikas sa kinabuhi niini nga si Maam Michelle kuyog ang ilang mga anak, ug sila Board Member Dr. Ruiz, Board Member Irish Arnado-Beñola, Municipal Kagawad Florencia Sentillas, Municipal Kagawad Nazarius Wata, Rio del Pilar Kapitan Boy de Gracia, Batulaki Kapitan Christopher Talangin, Glan Acting Municipal Tourism Officer Ms. Roa Wadingan, ug uban pang barangay ug tribal leaders lakip na ang USAID Protect Wildlife-Philippine Eagle Foundation, sa pagsuporta nila Senador Manny ug Congressman Ruel Pacquiao ug Vice Governor Elmer De Peralta.

Facebook Comments

From Advertisers