Electrician gipusil-patay samtang nagdula’g mobile legends

Davao City- Personal nga dumot ang gilantaw nga motibo sa kapulisan sa pagpusil-patay sa usa ka electrician sa may Purok 1, Brgy. La Filipina Tagum City, Davao del Norte.

Giila ang biktima nga si Geon Rhee Duron Barriga, 31 anyos, electrician sa usa ka retail appliances company.

Sa imbestigasyon, gibutyag sa asawa sa biktima nga si Mira Mae Barriga, nga alas-7:00 sa gabie niadtong Oktobre 18, 2021, samtang nagdula og Mobile Legends (ML) ang iyahang bana sa kiosk tapad sa ilahang balay nakadungog nalang kini’g kusog nga buto, dihang iyaha kining gisubay naabtan niya ang biktima nga mikirig ug nagkadugo ang ulo.


Gisulayan pa og salbar sa rescue team sa Tagum CDRRMO ang biktima human makahiagom og samad pinusilan sa ulo apan nakabsan na kini sa iyahang kinabuhi.

Mga basyo sa bala sa gituohang gikan sa 5.56 rifle ang narekober sa SOCO sa crime scene ug gisumite na ngadto sa Davao del Norte Provincial Crime Laboratory Office aron ipailawom sa ballistic examination.
Adunay pipila pa ka mga anggulo ang gilantaw sa mga awtoridad.

Nipahigayon na karon og checkpoint, Oplan Bakal Sita ug hot pursuit operation ang Tagum Police sa niiktad nga mga suspetsado.

RadyoMaN Aimee Guinita

Facebook Comments