Nagluntad ang engkuwentro sa tunga sang mga rebelde nga New Peoples Army ukon NPA kag mga katapo sang militar sa nabukid nga bahin sang Barangay Trangka, Maasin, Iloilo kahapon sang udto.
Ginpahayag ni Lt. Col. Sisenando Magbalot, Commander sang 61st Infantry Battalion nga nagluntad ang engkuwentro matapos nagpatrolya ang mga suldado sa nasambit nga lugar kasunod sang ila nabaton sang report nga didto nagahukmong ang mga rebelde.
Suno kay Magbalot nga ila nasalapuan ang mga temporaryo nga puluy-an nga ginhimo-himo sang mga rebelde kon sa diin nagbayluhanay sang luthang ang magtimbang nga bahin.
Naglawig sang kapin sa 30 minutos ang engkuwentro sa tunga sang militar kag ginabanta 20 tubtub 30 ka mga rebelde.
Matapos ang engkuwentro, wala sang napilasan sa puwersa sang gobyerno apang nagapati ang militar nga may napilasan sa bahin sang NPA bangud sa mga tinulo sang dugo sa banas nga gin-agyan sang mag rebelde sa pagpalagyo.
Narecover sang militar sa ginluntaran sang engkuwentro ang lima ka backpack may mga subersibo nga dokumento, improvised explosive device kag duha ka laptop computer.
