Ginpalawig pa ang Enhanced Community Quarantine sa Siyudad sang Iloilo tubtub sa Abril 30.
Ini ang gindeklarar ni Mayor Jerry Trenas kasunod sang extension sang Luzonwide ECQ nga gin-aprobahan ni Presidente Rodrigo Duterte.
Sa deklarasyon ni Mayor Jerry Trenas, ginganyat sini ang publiko nga magsunod sa gihapon sa ginapatuman nga mga pagsulundan sa paglikaw sa balatian nga covid-19.
Suno sa Alkalde nga ginhimo niya ang desisyon matapos ang nagakaigo nga konsultasyon sa mga experto kon bala dapat pa nga palawigon ang ginapatuman nga ECQ.
Ginhatagan pagtamod ni Trenas nga bangud man sa nagataas nga numero sang nagpositibo sa covid-19 sa Western Visayas , ginpakamaayo niya nga palawigon man ang Enhanced Community Quarantine sa Siyudad sang Iloilo.
Samtang sa bahin sang probinsya sang Iloilo, ginalauman nga magapaguwa man sang executive order si Governor Arthur Defensor Jr. subong nga adlaw nga nagapalawig sang enhanced community quarantine sa bug-os nga probinsya.
