Enrollment, extended hangtud July 15- DEPED Gensan

17

General Santos City–Gikumpirma ni DEPED School Division Superintendent Romelito Flores nga gipalugwayan pa ang enrollment sa mga pribado ug pampublikong tunghaan sa nasud Pilipinas sa rason nga mahatagan pa ug higayon kadtong mga ginikanan nga wala pa nakapa-enroll sa ilang mga anak gumikan niining nasinatian nga sitwasyon sa pandemya sa covid-19.

Kahibaluan nga niadtong Hunyo 30 pa unta nahuman ang usa ka bulan nga enrollment apan nakita sa buhatan sa DEPED nga daghan pang mga estudyante nga wala pa na-enroll sa ilang mga ginikanan hinungdan nga kini gipalugwayan pa hangtod sa Hulyo 15 ning kasamtangang tuig.


Pamahayag ni Flores nga dunay bag-ong gilusad nga programa ang DEPED Gensan ang enrollment on wheels kung asa dunay mga sakyanan nga maglibot suroy sa matag komunidad sa dakbayan kauban ang mga staff sa DEPED.

Adunay dala nga enrollment form ang mga nasangpit aron si kinsa mang mga ginikanan nga maagian sa maong sakyanan ang pwedeng ipa-enroll ang ilang mga anak.

Human ug fill-up sa form ihatag lamang nila ang enrollment form sa mga staff ug sila na ang muhatod sa mga form sa eskwelahan nga ilang gi-enrolan. Pagpaklaro ni Flores nga kini alang lang sa tanan nga magtutungha sa mga pampublikong tunghaan sa Gensan.

Samtang gipaklaro usab sa opisyal nga sa pagkakaron duna nay 110,000 ka estudyante ang na-enroll sa Dep-ed Gensan. 103,000 niini sa pampublikong tunghaan ug 6,000 sa pribadong tunghaan.

Ang maong ihap, ubos kumpara niadtong nakalabay’ng school year nga dunay 173,000 ang ihap sa na-enroll .(RV)




Facebook Comments