Davao City – Gipaniguro sa Department of Education (DepEd) nga dili maapektuhan ang enrollment sa mga estudyante sa Barangay 23-C, Davao City nga apektado sa gipatumang hard lockdown.
Sa interbyu sa DXDC RMN Davao kang Jenielito Atillo, Spokesperson sa DepEd-XI, gibutyag niini nga apektado ang Zonta Elementary School sa maong barangay diin nagbaton na kini og 680 enrollees ug adunay 23 public school teachers.
“Gusto nato’ng i-emphasize sa katawhan nga dili maapektuhan sa lockdown ang enrollment procedure dinha sa Zonta Elementary School Sta. Ana District ning dakbayan sa Davao. Naa na tay pamaagi to respond to that, so dili angayan nga mabalaka,” tataw ni Atillo.
Gibutyag ni Atillo nga tungod sa sitwasyon, wagtangon una ang drop box enrollment ug ibalik ang online remote enrollment.
Dugang tigpamaba sa DepEd-XI nga ugaling magpadayon ang lockdown hangtud abri-klase sa Agosto 24, 2020, gipangandaman na sa departamento ang pagpatuman sa online o modular scheme depende sa kung unsa ang gusto nga learning mode sa mayorya sa mga ginikanan.
RadyoMaN Kirby Manzon
