ESTUDYANTE SA MALUNGON NATIONAL HIGH SCHOOL NGA PALARANG NAKASULOD SA YOUTH EXCHANGE PROGRAM ANAA NA SA AMERIKA

Sarangani Province–Niabot na sa Amerika partikularminte sa estado sa Michigan ang estudyante sa Malungon National High School nga si Kenneth Lloyd Manombilang, isip kabahin sa traynta (30) kabuok magtutungha sa high school nga swerteng napilian sa tibuok Pilipinas nga nakaapil sa youth exchange program gitawag nga Kennedy-Lugar Youth Exchange and Study/YES Program.

Sa mga picture og video nga makita sa iyang Facebook account, makita sa iyang hulagway ang kalipay nga nakaabot na kini sa Amerika. Gisugat sya sa iyang host family ang pamilyang Cota. Iya ng nabisita ang Tawas Area High School sa Michigan nga maoy iyang eskwelahan sulod sa usa (1) ka school year.

Sa iyang pakigkita kang Governor Steve Chiongbian Solon atong Hulyo 31, malipayon niining gipadayag nga excited na kini makatungtong sa Amerika. Libre kini sa mga galastuhan tungod kay gipondohan ang programa sa gobyerno sa Amerika sa US Department of State ilalum sa Bureau of Educational and Cultural Affairs, samtang ang nagdumala sa programa dinhi sa Pilipinas mao ang AFS Intercultural Programs Philippines og US Embassy in the Philippines.


Dise-sais (16) anyos ang iyang pangidaron gikan sa tribong Tagakaulo, taga-Barangay Lower Mainit, Malungon, og anaa sa Grade 11. Sya ang ikaduhang estudyante sa Malungon National High School nga nakaapil sa maong exchange program. Unang nakaapil niaging tuig ang Cebuano nga si Jick Acupan nga ni-gradwar didto sa Amerika sa Grade 12 isip magna cum laude.

Napulo (10) ka bulan silang mu-eskwela sa Amerika. Napulo ka bulan usab silang magpuyo sa ilang host family. Na-assign si Manombilang sa estado sa Michigan, samtang ang iyang mga kauban ang anaa sa ubang estado sa Amerika sama sa New York, Texas, New Mexico og uban pang lugar sa USA.

Kay kini usa man ka exchange program, ilang matun-an ang kultura sa mga Amerikano, samtang sila ang mupaambit usab sa kultura sa mga Pilipino.

Nanghinaot na lamang si Governor Solon ngadto kang Manombilang, kuyog sila Vice Governor Elmer De Peralta, Board Member Joseph Calanao og tanang board member, nga panalanginan kini sa Kahitas-an taliwala nga na-stroke ang iyang amahan og ang iyang inahan ang usa ka day care worker. May giayudang pinansyal ang Gobernador og Bise Gobernador aron may magamit kini sa mga kalihukan. Una na syang nakigkita kang Malungon Mayor Tessa Constantino kauban ang iyang mentor nga si Maam Kim Boclaras una pa sila nangadto sa Kapitolyo.

Gawas aning Kennedy-Lugar Youth Exchange and Study Program sa Amerika, suportado usab sa Sulong Sarangani program ni Governor Solon kauban sila Senador Manny og Congressman Ruel Pacquiao ang uban pang youth exchange program sa ubang mga nasud, sama na lang sa sikat nga programa sa nasud Japan kung diin ang mga kabataan gikan sa nagkadaiyang nasyon ang makig-uban sa mga kapwa Asyanong kabataan onboard sulod sa labing mahal nga barko sa Japan ang Japanese luxury liner nga MS Nippon Maru sulod sa singkwenta (50) ka adlaw gitawag kinig SSEAYP kon Ship for Southeast Asian and Japanese Youth Program.

Facebook Comments