Ex-Brgy. Captain nakuhaan armas

667

TALISAY CITY – Detained na karon sa custodial facility sang Talisay City Police Station ang isa ka anay Punong Barangay kag karon number 1 kagawad sang Brgy. San Fernando, Talisay City matapos ini nakuhaan sang duha ka armas nga wala sang lisensya may mga las 7:40 sini gid lamang nga aga.

Ang nadakpan ginkilala kay Romulo Banhao Jr., 55 anyos, residente sang Purok Langka, Brgy. San Fernando, ciudad sang Talisay.

Ginpatigayon sang mga katapo sang Negros Occidental Police Provincial Office kag sang Talisay City Police Station ang operasyon pinaagi naman sa Search Warrant nga gin-issue ni Hon. Judge Estefanio Libutan Jr., Executive Judge RTC 6th Judicial Region, Branch 50, Bacolod City, napetsahan May 15, 2019.

Narecover sang mga utoridad kay Banhao ang isa ka unit sang .45 nga pistola kag isa ka unit sang KG9 Sub Machine Gun.

Nakuha man sa iya ang 7 ka magazine para sa .45 kag machine gun lakip na ang 66 ka live ammunition kag 13 ka live ammos reload para sa .45 caliber pistol.

Angut sini, nagdepensa si Banhao kag nagsiling nga ang armas para sa ila proteksyon bangud nga yara sila sa nabukid nga bahin kag may gamay siya nga negosyo.

Suno sa iya nga ginahulat pa niya ang lisensya para sa amo nga mga armas.

[image: image.png]

Facebook Comments

From Advertisers