‘Facial detection’ CCTV camera, igbubutang ha syudad han Tacloban

Kaparte han kampanya han Tacloban City Government kontra kriminalidad. Magtataod hin CCTV Camera an Local Government ha Downtown area, entry ngan exit points han Syudad.

Damo naman gud an nahipapatik nga pangawat, krimen ngan iba pa sanglit magiging mata an CCTV Camera para maklaro ngan matad-an dayon an mga suspek nga nagpapaluyo hini.

Sumala kan Tacloban City Administrator Atty. Irene Chiu, diri basta basta ini nga ipapantaod nga CCTV Camera kay mayada ini facial detection software nga makakabulig nga solusyunan an magkadurudilain nga krimen.


“Mayron itong facial detection software para kung may wanted person man o terrorist eh mahuhuli agad.”

Mayada ini Command Control Center nga mahihimutang ha City Hall para magmonitor han mga CCTV Cameras.

Smart camera liwat an tawag hini kay konektado ini gamit an fiber optic technology.

Sumala naman kan Management Information Division Head Randy Calahi, pwede gihapon makilal-an han smart camera an mga wanted person pinaagi han software nga magloload han data base tikang ha PNP.

Waray pa inisyal nga ihap kun pira nga CCTV Camera an papaliton ngan kun pira an kantidad hini.

Magdudumara pa hin public bidding an MID.

Mahihinumduman nga nagkamayada pala shooting incident dapit ha Real St. Palawan Pawnshop kun diin ginpusil patay an security guard.

Dara liwat han low quality han CCTV, ngada yana diri pa makilal-an an suspek.

Facebook Comments