Pagadian City – Malampuson ang gihimo nga Synchronize Final Testing and Sealing sa mga Vote Counting Machines kun (VCMs) sa nagkada-iyang clustered precincts sa tibook probinsya sa Zamboanga del Sur aron sutaon kun dili ba kini palyado nga maoy gamiton sa eleksyon karung umaabot adlaw nga lunes.
Pinaagi sa mga magtutudlo nga maoy giilang mga Electoral Board Members gisulayan ang mga VCMs atubangan usab sa nagkadaiyang watchers gikan sa lain-lain nga partido.
Atol sa proseso aktuwal nga nibotar ang pulo ka botante gamit ang mga official ballot nga dunay tatak sample diin human gipakaon ngadto sa VCM ang balota diha-diha gikompara ang nigawas nga resibo kun tukma ba sa ilang gibotoran.
Lakip nga gisulayan ang voter registration verification system (VRVS) aron maoy mokomperma sa indibidwal kun rehistrado ba kini nga botante sa duolan nga voting precincts.
Dunay naka-standby nga baterya nga alang sa VCMs isip pagpangadam sa kun ugaling makasinati og power interruption samtang power bank usab ang gi-andam alang sa VRVS.
Mahinumduman nga sa 681 ka Barangay sa probinsya lauman nga molinya aron mobotar ang 640,900 nga rehistradong botante ngadto sa 987 ka mga clustered precincts.
