Forced evac gumikan sa Tigatto landslide

Davao City – Gimando na karon sa Barangay Tigatto Disaster Risk Reduction Management Council sa mga nanimuyo sa kilid sa bukid sa purok 6 nga mubakwit na gumikan sa pagdahili sa yuta nunot sa kusog nga ulan 10:00 kagabii.

Sumala ni BDRRMC Officer 1st Responder Ritchell Mangubat nga magpatuman sila og force evacuation sa mga residente human nakitaan og sinyales nga mahitabo ang laing hugna sa pagdahili sa yuta.

Sigun ni Mangubat, adunay taas nga liki sa yuta ibabaw sa bukid ug timailhan nga dilikado gihapon ang lugar sa laing mahitabong landslide rason sa force evacuation sa 15 ka pamilya nga nagpuyo sa mao nga dapit.


Mukabat sa 40 hangtud 50 ft. sa gihabugon ang pagdahili sa yuta kagabii resulta tulo ka balay ang halos natabunan ug 10 ka pamilya ang apektado nga anaa na karon sa evacuation center sa barangay.

Gisulti sa mga residente nga kusog ang lagapak sa kilat nga inubanan sa kusog nga hangin ug pagbundak sa ulan ug pipila ka minuto nabati na lang nila ang dahunog sa pagdahili sa yuta.

Nagtoo ang mga nanimuyo sa lugar nga kilat ang miigo sa bukid ug hinungdan sa landslide gumikan sa pagkaputol sa mga kahoy sa bakilid sa bukid.

Nanawagan karon ang mga apektadong pamilya sa lokal nga kagamhanan nga matabangan sila gikan sa pinansiyal,sapot, ug mga pagkaon samtang anaa pa sila sa evacuation center.

RadyoMaN Joel Viray

Facebook Comments