BACOLOD CITY – Nadakpan sang Police Station 1 ang tatlo ka mga persona sa ginpatigayon nga buy bust operation sang Biyernes sang hapon sa kilid gid lamang sang Brgy. Hall sang Brgy. 22, syudad sang Bacolod.
Arestado ang subject sa amo nga operasyon nga si Ramon Bertudez, 54 anyos sang Brgy. 34, Bacolod City.
Nakuha kay Bertudez, ang tatlo ka sachet sang suspected shabu, kwarta, kag drug paraphernalia.
Suno sa hepe sang Police Station 1 – S/Insp. Leo Estopa, ang suspek ang una na nag-sungka sa OPLAN Tokhang apang nagbalik naman sa pag-duso sang illegal nga droga.
Samtang, nadakpan man sa buy bust sanday Mary Grace Sernal kag Virgilio Lopez, tanan residente sang Brgy. Guinhalaran sa siudad sang Silay.
Sa pihak nga bahin, narecover naman sang mga katapo sang Police Station 2 ang armas kag druga sa ginpatigayon nga drug bust operation kahapon.
Nadakpan ang suspek nga si Junjun Rosario, residente sang Purok Lison, Bryg. 1, syudad sang Bacolod.
Na-recover gikan kay Rosario ang lima tanan ka sachets sang suspected shabu, mga drug paraphernalia, armas nga kalibre 45 nga pistola kag mga bala./dyHB BACOLOD
