Gangsterism: Dilemma sa tanang stakeholders

Davao City- Gikinahanglang magtinabangay ang tanang sektor sa katilingban diha sa pagsulbad sa problema sa mga kabataang nahilambigit sa youth kun teenage gangs.

Sumala ni City Social Services and Development Office (CSSDO) head Malou Bermudo, ang mga ginikanan angay magpakabana sa pag-monitor ug pag-atiman sa ilang mga anak aron dili kini madani sa mga dautang impluwensya.

Adunay mga programa usab ang mga barangay alang sa mga kabatan-onan busa matud ni Bermudo, angay nga seryosuhon kini sa pagpatuman partikular na ang curfew on minors ug pagpahiluna og tukmang mga youth intervention programs.


“Ang role nato sa pamilya, we should know kung asa atong mga bata, mag-set ta’g limit kung asa sila. Of course, ang mga Barangay Council diha sa implementasyon sa mga Barangay Ordinances, ipatuman ni siya o closely ma-monitor o ma-implementar nila ni,” sumala ni Bermudo.

Giawhag usab ni Bermudo ang kapulisan nga palapdan pa ang ilang community police visibility aron makahatag og kahadlok sa gangs nga naga-riot ug aron magsilbing effective preventive measure diha sa barangay level.

Gidugang usab ni Bermudo nga padayon nilang gi-ayudahan ug gitunulan og mga interventions ang gitawag nga mga ‘Children in Conflict with the Law’ kun CICL dinhi sa syudad sulod diha sa ‘Bahay Pag-asa’ human sila nahilambigit sa mga krimen ug nasalbar sa mga tinugyanan sa balaud.

RadyoMan Aimee Gunita

Facebook Comments