Gikaingong supporter sa grupong Dawla Islamiya, patay sa anti-illegal drug operation sa Polomolok

Polomolok, South Cotabato— Patay ang usa ka Conrado Casabal, Alias Dado Casabal, 47 anyos nga taga Barangay Poblacion, Polomolok, South Cotabato human matud pa kining misukol ngadto sa kapulisan atol sa gihimong Buy-bust operation atubangan sa harvest Feedmill Compound, Purok Riverside, Barangay Silway 7, Polomolok South Cotabato.

Matud ni Police Captain Randy Apostol, Deputy Chief of Police sa Polomolok, PNP nga nahulog sa bitag sa otoridad ang suspek pinaage sa pagpakaron-ingnon nga mopalit ug druga ang usa ka sakop sa kapulisan. Sumala pa nga nakamatikod kini nga police ang iyang katransaksyon, mibunlot kini ug pusil apan naunhan kini sa myembro sa kapulisan.

Nadala pa sa ospital ang nasangpit apan gideklara kining dead on arrival. Narekober sa posisyon sa suspek ang pipila ka sachet sa gituohang shabu ingon ang usa ka unit sa single shot nga pusil ug buhing bala. Dugang pagbutyag ni Police Captain Apostol nga kanhi nang nadakpan ang suspek gumikan gihapon sa iligal nga droga niadtong tuig 2017.


Samtang gikumpirma usab niini nga supporter ang suspek sa grupong Dawla Islamiya kansa nagalihukan sa lungsod sa Polomolok.

Facebook Comments