GIN-AKO | NPA gin-ako ang pagpatay sa BPAT member, civil security ni Mayor Magsie

2502

NEGROS OCCIDENTAL – Gin-ako na sang New People’s Army (NPA) ang pagluthang sa biktima nga si Dave Vallente sa Brgy. Odiong, banwa sang Moises Padilla sa insidente nga natabo sadtong March 30, 2018 sang gab-i.

Sa press release nga ginpagwa sang Central Negros Guerilla Front sang NPA pinaagi sa spokesperson sini nga si Ka JB Regalado, ginpahayag sang rebelde nga si Dave ang isa sa mga masupog nga naga kontra sa hublag kag BPAT sa Magallon.

Suno sa NPA, si Dave ang masupog nga asset sang AFP kag CIDG, naghupot sang illegal nga mga armas, arogante nga nagapamhug kag nagapang-taya sa pumuluyo sa lugar.

Ginpahayag pa ni Ka JB nga tuyo gid lamang nila kuntani nga dakpon si Dave dala ang warrant of arrest malapit sa ila balay agud paatubangon sa people’s court apang ini ang nagdalagan rason nga napilitan ang arresting officer sang NPA nga ini ang tiruhon.

Sa pihak nga bahin, ginaako man sang NPA ang pagsilot patay sa isa pa gid ka biktima nga si anay 11th IBPA Staff Sgt. Jose Joerito Amable kag anay Police officer Alejandro Borres sang nagligad nga April 9, 2018 las 6:25 sang gab-i sa Brgy. Bulad, Crossing Magallon, Isabela.

Apang, ila naman ginapanginwala nga sila ang nagtiro patay sa BPAT nga si Federico Bitgue kag nag-samad sa 10-anyos nga bata kag kay Alvin Genterola.

Ang matuod suno sa NPA nga si Amable kag Borres lang ang legitimate nga military target sang NPA gani sila lang ang ginpalapitan kag ginpatuman ang silot batuk sa ila.

Gina-akusahan sang NPA si Amable nga amo ang “think tanks” kag “militarist tactician” sa mga poderoso kag kontra pumuluyo nga mga kalakasan ni Magsie Pena sa Hacienda San Benito.

Pahayag sang rebelde, si Amable ang kakonsabo sa militarista nga pagpadalagan sang pamulitika sa bug-os nga Magallon bilang Civil Defense Security Head.

Samtang si Retired PNP Officer Alejandro Borres isa man sa mga salaligan nga tinawo ni Peña sa Magallon.

Kakonsabo man siya sa mga kabulastugan nga gawi kag kontra-hublag nga mga lihok ni Peña kag Amable sa Moises Padilla./dyHB BACOLOD

Facebook Comments