Ginang, patay human nalagpot sa motor

Patay ang usa ka ginang human nalagpot sa gisakyang motorsiklo mga alas 8:45 sa gabie niadtong Dominggo sa Binuangan, Misamis Oriental.

 

Kini ang subong gipahibalo ni SPO1 Albert Sumugoy sa Binuangan Municipal Police Station sa dihang nibalik ang pamilya sa biktima sa ilang buhatan kagahapong adlawa.

 

Sa interview sa dxCC-RMN, gibutyag ni SPO1 Sumugoy nga ang biktimang namatay mao ang 41 anyos nga si Florabel Cortez nga taga Zone 2, Fuentes, Maria Cristina, Iligan City.


 

Matud ni SPO1 Sumugoy nga nakaangkas sa motorsiklo ang biktima nga gimaneho sa iyang bana gikan sa Gingoog City ug pauli na unta sa Iligan City sa dihang nahitabo ang insedente sa Binuangan.

 

Gitoohan nga nakatulog ang banang 43 anyos nga si Jojie Cortez busa nadisgrasya ug nalagpot sa motor ang asawa diin ulan-ulan usab niadtong higayona.

 

Nasayran nga nakahelmet ang duha apan wala ma-lock ang helmet sa asawa maong pagkalagpot wala maproteksyonan niini ang ulo ug nagliki ang walang bahin sa ulo nga maoy hinungdan sa iyang kamatayon.

 

Gidala pa sa ospital ang biktima apan wala na kini makaagwanta tungod sa naangkong liki sa ulo.

Facebook Comments