Pilason ang isa ka lalaki matapos ginluthang samtang nagasakay sa iya motorsiklo mga alas 7:30 kagab-i sa barangay Cauayan, Carles, Iloilo.
Ang biktima ginkilala nga si Franklin Vicente, 38 anyos, pumuluyo sang nasambit nga lugar samtang ang suspek ginkilala kay remel Geco, 39 anyos sang barangay Dayhagan, Pilar, Capiz.
Ginpahayag ni PO2 Alexis Bataga sang Carles PNP nga base sa ila pagpangusisa, naga-inum ang suspek sa barangay Cauayan kag sang naglabay ang biktima sakay sa motorsiklo, hinali na lamangh sini nga ginluthang gamit ang de dose nga shotgun ukon ginatawag nga “puagalite”.
Nakaagum sang pilas sa natuo nga paa ang biktima kag gindala sa Roxas Memorial Hospital kag yara na sa maayo nga kahimtangan.
Gilayon naman nga nagpalagyo ang suspek kag padayon nga ginapangita sang kapulisan samtang na-recover naman sang mga otoridad ang gingamit sini nga “pagalite”.
