BACOLOD CITY – Ginhold up na ginkuha pa sang mga suspek ang traysikol sang isa ka biktima sa natabo nga hold-up kaina sang kaagahon sa area sang Brgy. Villamonte.
Nakilala ang biktima nga si Jemar Sacare, 18 anyos ang edad, residente sang Purok Bayanihan, Brgy. Villamonte.
Suno sa biktima nga may mg alas 3:30 kaina sang kaagahon, may nagsakay sa iya nga duha ka pasahero halin sa Villamonte, apang sa pag-abot sa area malapit sa isa ka unibersidad, nagdeklara sang hold-up ang mga suspek.
Gilayon nga ginkuot sang mga ini ang bulsa sang biktima kag ila nakuha ang ahaw-ahaw gid lamang nga 200 pesos nga koleksyon ni Jemar.
Wala pa nakuntento ang mga suspek, ila pa gindala ang traysikol sang biktima nga iya man lang gina-arkilahan sang 150 pesos kada adlaw.
Sa pihak nga bahin, may natabo man nga isa pa gid ka hold-up sa area gihapon sang Brgy. Villamonte.
Ang biktima nakilala kay Wendel Yuson, 23 anyos ang edad, tumandok sang Vallehermoso, Negros Oriental, temporaryo nga naga puyo sa East Homes 2, Brgy. Estefania kag isa ka helper sang truck nga ginapanag iyahan sang isa ka merchandising company.
Suno sa biktima nga may mga la una kaina sang kaagahon, may duha ka wala nakilala nga lalaki nga armado sang .45 kalibre ang pistol ang nag-agaw sang iya wallet nga may unod 12 mil pesos kag nagpalagyo padlong sa norte nga direksyon./dyHB BACOLOD
