GINPANGTIRO | Suspek nagpangtiro, 3 pilason

SIPALAY CITY, NEGROS OCCIDENTAL – Tatlo ang nagkalasamaran matapos nga ini sila ang gintiro sang wala makilala nga suspek kaina sang kaagahon sa Brgy. Nabulao, Sipalay City.

Nakilala ang mga nasamaran nga amo sanday Jade Openia, 24 anyos ang edad, soltero kag pumuluyo sang Vista Alegre, Brgy. Nabulao, Jordan Occimar kag ang ginkilala gid lamang nga si “Nueva.”

Suno sa Sipalay City Police Station nga may mga las 12:30 kaina sang gab-i, bisperas sang fiesta, sa Sitio Villarica, Brgy. Nabulao natabo ang insidente kon diin gintiro sang suspek, gamit ang wala matumod nga kalibre sang armas ang mga biktima.


Ginpahayag sang amay sang isa sa mga biktima nga si Jessie Openia nga ang iya bata nga si Jade ang naigo sa iya wala nga paa kag ang duha niya ka mga kaupdanan ang may igo man sang luthang.

Ang tatlo ka mga biktima gindala sa Corazon Locsin Montelibano Memorial Regional Hospital, samtang padayon naman ang hot pursuit operation batuk sa suspek./dyHB BACOLOD

Facebook Comments