GINSPARU? | 2 ka tawo ni Mayor Magsie, 1 ka sibilyan patay matapos ginpangtiro sa bilasyunan, 2 pilason

ISABELA, NEGROS OCCIDENTAL – (2nd Update) May ginalantaw na karon nga mga suspek ang pulis kag military angut sa natabu nga shooting incident kon diin tatlo patay kag duha ang nasamaran sa isa ka bilasyunan sa area sang Crossing Magallon, Brgy. Bulad, banwa sang Isabela, may mga las 6:30 kagab-i.

Nakilala ang mga biktima nga nagkalamatay nga amo sanday retired Staff Sergeant Jose Joerito Amable, 57 anyos ang edad, tumandok san Anilao, Iloilo kag head sang Civil Security Group ni Moises Padilla Mayor Magsie Peña, retired police Alejandro Borres kag sibilyan nga si Pedirico Bitgue, pumuluyo sang Moises Padilla.

Napilasan naman sa insidente sanday Timothy Aaron Achivar, 10 anyos kag Alquin Genterula Jr., isa ka manunudlo kon diin lunsay sila ginpangdala sa isa ka ospital sa Bacolod.


Ang mga biktima ang yara sa bilasyunan sa haya sang napatay nga si Dennis Banares nga brother-in-law naman sang biktima nga si Amable.

Suno sa bata sang isa sa biktima nga si Pedirico nga madasig ang hitabo kon diin samtang nga nagapungko sa gwa sang bilasyunan ang mga biktima, may naglabay nga motorsiklo, sakay ang mga suspek kag hinali na lamang sila nga ginpangtiro.

Pahayag pa sang mga nakasaksi nga nagbuko pa kuntani nga magdalagan ang iya amay nga si Pedirico apang ini siya ang ginlagas pa kag ginluthang.

Samtang, suno naman sa asawa ni Joerito Amable nga si Marilyn nga nagalibog ang iya ulo kon ngaa ginpatay ang iya bana bangud wala siya sang may nahibaluan nga kontra sini.

Siling pa ni Marilyn nga indi man siya sigurado kon bala ang iya gid man bana ang target sang krimen kag indi man siya makasiling nga rebelding NPA ukon katapo sang Special Partisan Unit (Sparu) ang may kahimuan sini.

Ini apisar nga nakabati na sila sang istorya nga ginapahalong ang iya bana sang mga katapo sang NPA sadto pa bangod man sa iya koneksyon kay Mayor Magsie Peña.

Sa follow-up investigation naman nga ginpatigayon sang Isabela PNP sa pagpanguna sang hepe sini nga si PCI Ruben Pajarito, may ginpakita sila nga pictures sang posible nga mga suspek kay may positibo na nga gintudlo ang mga witness.

Mga lima naman ang suspek sa diin mga nagsakay sa duha ka motor, duha ang driver samtang tatlo ang tirador.

Ginacheck pa sang mga otoridad ang ginasiling presensya sang mga 12 anyos nga bata nga upod sang lima.

Narecover sa lugar ang 28 ka empty shells sang kalibre 45 kag 9mm pistol./dyHB BACOLOD

Facebook Comments