BACOLOD CITY – Isa na naman ka soltero ang nabiktima sang “hurikap girl” sa area sang Bacolod City public plaza kagab-i.
Nakilala ang biktima nga si Ryan, 33 anyos ang edad, single kag pumuluyo sang Purok Pag-asa, Brgy. Alijis, Bacolod City.
Suno sa biktima nga may mga las 9:20 kagab-i, samtang nga ini siya ang nagalakat sa dalan Gastuslao, sa atubang sang isa ka food chain sa public plaza, may isa ka babayi nga wala niya nakilala ang nagpalapit sa iya.
Pahayag ang biktima nga nakibot siya sang nagpamangkot ang amo nga babayi kon bala luyag niya magkuha sang “chicks.”
Kadungan sa pagpamangkot, ginahurikap sang amo nga babayi ang pila ka bahin sang iya lawas.
Sang ulihi, natalupangdan sang biktima nga wala na ang iya wallet nga iya ginsulod sa tuo nga bulsa sang iya shorts nga may unod 7 mil pesos.
Nagapati si Ryan nga ang amo nga babayi ang nagkuha sang iya wallet gani nagparecord ini sa Police Station 1./dyHB BACOLOD
