Liwat nga ginpasiguro ni Interior and Local Government Officer-in-Charge Eduardo Año sa publiko nga indi pagpahanugutan sang gobyerno ang pagtukod sang isa ka casino sa isla sang Boracay .
Suno kay Año, antes pa man ginsuguran ang rehabilitasyon , indi na pabor si Presidente Rodrigo Duterte sa plano nga konstruksyon sang casino sa isla.
Dugang pa niya nga bisan pa ang pila ka mga cabinet member partikular na si Boracay Rehabilitation Inter-Agency Task Force Chief kag Environment Secretary Roy Cimatu ang indi pabor sa pagbutang sang casino sa pinaka-popular nga tourist destination.
Suno pa kay Año nga wala nagabisita ang mga turista sa Boracay agud magsugal kundi agud maglangoy kag magbakasyon.
“The people go to Boracay to swim, not to gamble. So there will be no casino there,” pahayag ni Año.
Madumduman nga ginpagwa sang Macau-based Galaxy Entertainment Group kag ang Filipino partner sini nga AB Leisure Exponent Incorporated ang ila plano nga magtukod sang USD500-million nga balor sang integrated resort-casino complex sa 23-hectare property sa barangay Manoc-Manoc sa isla sang Boracay.
