Gobyerno, tiwalang mababawi ang revenue collection sa mga susunod na taon

83

Tiwala si Finance Secretary Carlos Dominguez na makakabawi ang bansa sa revenue collection sa gitna pa rin ng epekto ng COVID-19 pandemic.

Sa pagdinig ng ₱4.5 trillion 2021 national budget, batay sa iprinisentang projection ay aabot lamang sa ₱2.5 trillion ang revenue collection ngayong 2020, mas mababa kumpara sa ₱3.1 trillion na kinita noong 2019.

Ang pagbaba sa revenue collection ngayong taon ay resulta pa rin ng hindi inaasahang epekto ng COVID-19 sa ekonomiya ng bansa.

Sa kabilang banda ay inaasahan naman ni Dominguez na makaka-recover nang bahagya ang revenue collection sa 2021 na tinatayang aabot sa ₱2.7 trillion at tataas pa sa ₱3 trillion sa 2022.

Iginiit ng opisyal na malaking tulong sa pagtaas ng kita ng pamahalaan ang koleksyon mula sa TRAIN Law.

Nitong 2019 aniya ay tumaas sa 91% ang revenue collection sa ilalim ng TRAIN Law o katumbas ng 14.5% ng Gross Domestic Product (GDP) noong nakaraang taon na siyang itinuturing na ‘best performance’ sa loob ng 22 taon.

Itinutulak naman ni Dominguez ang pag-apruba sa mga panukala tulad ng CREATE, FIST at GUIDE ACT na sesentro sa pagbangon at pagbibigay suporta sa mga Pilipino sa gitna ng pandemic.




Binigyang-diin ng kalihim ang tuloy-tuloy na implementasyon ng Build, Build, Build program dahil ito ang may pinakamalaking multiplier effect sa pagsigla ng ekonomiya.

Facebook Comments