Governor Zubiri, gisiguro ang suporta ngadto sa PNP Bukidnon; Unang tahas gisangon sa bag-o nga Provincial Director

Malaybalay City, Bukidnon – Nagpadayag ug pagsuporta si Governor Jose Maria R. Zubiri Jr. ngadto sa kapulisan sa probinsya sa Bukidnon.
Kagahapon nahimong guest speaker si Governor Zubiri atol sa gipahigayon nga turn-over ceremony sa bag-o nga Provincial Director sa Bukidnon PPO nga si PSSUPT Benedicto T. Pintor.
Sa iyang mensahe gipadayag sa gobernador ang iyang pagsuporta sa kapulisan sa probinsya.
Bugtong lang matud pa ang dili niya mahatag ang kabahin sa intelligence fund tungod kay gipanghambog niini nga sa tanang probinsya sa Pilipinas ang Bukidnon lang ang wala nidawat ug intelligence fund.
Katarungan niini nga gibansagang pocket money ang intelligence fund tungod kay dili na kini e-audit pa sa COA ug dili siya buot nga magduda kaniya ang katawhan.
Samtang nanghinaut usab ang gobernador nga mahimo sa bag-ong pamubuan sa PNP Bukidnon ang trabaho niini ilabina nga nag-atubang pa gihapon sa problema sa kriminalidad, illegal nga droga ug illegal nga sugal ang probinsya.
Unang tahas nga gihatag ni Zubiri ngadto kang Provicial Director Pintor nga sulbaron ang problema sa mga lumad diin ning kasamtangang nagkampuhan atubangan sa provincial capitol ning siyudad tungod sa hulga sa seguridad sa ilang dapit.
Nagpadayag usab ug kadismaya ang gobernador ang daw walay kasulbaran nga problema sa illegal nga sugal sa Bukidnon nga daan nang gi-atubang sukad pa kaniadtong congressman pa matud pa siya sa ikatulong distrito ug hangtod karon nagpabilin pa gihapon ang paghitak sa illegal nga sugal ug apil kini sa iyang gipatutukan sa kapulisan.
Nasayran nga si PSSUPT Pintor gi-endorso mismo ni PNP Chief Ronald dela Rosa ngadto kaniya isip maoy mahimong provincial director sa Bukidnon.

Facebook Comments