SARANGANI PROVINCE– Mahitabo na karong Dominggo, Hunyo 9, ang pagsugod sa usa (1) ka semana nga labing dako nga Surgical, Medical og Dental Mission sa probinsya sa Sarangani kauban ang dul-an 150 kabuok mga banggiitang doctor og medical practitioners sa UST kon University of Santo Tomas nga gikan pa sa kauluhang Maynila og abroad, kuyog ang medical team sa General Santos Doctors Hospital.
Alang sa mga pasyente nga adunay major cases, sama sa mayoma, goiter, gallstone, thyroid, hernia, colostomy, lakip na katarata-pterygium, karong sayo sa buntag sa Dominggo matigayon ang inyong final screening sa Sarangani Provincial Hospital sulod sa compound sa Kapitolyo sa Sarangani. Dinhi mahibal-an kung kwalipikado kamong mupailalum sa major surgical operation og dinhi na usab ipabalo ang adlaw sa inyong operasyon.
Samtang, pagka-ala una sa hapon (1pm) karong Dominggo gihapon, sugdan na pud ang pag-opera sa mga minor cases, sama sa minor cyst. Wala nay prescreening sa minor surgical operation.
Sa pikas nga bahin, kadtong nakapalista na para sa medical og dental check up, adtuan lang ang Sarangani Provincial Hospital gikan Hunyo 10 paingon Hunyo 13 alang sa libreng medical og dental consultation og uban pang outpatient services, may libre pang mga tambal nga ihatag.
Prayoridad ang na-screen. Apan katong wala pa gyud nalista kon walk-in patients ang dawaton gihapon pero kinahanglan nga muagi usa sa Kasfala Hall sulod gihapon sa Sarangani Capitol Compound aron makuhaan og mga medical records.
Open kini sa tanan bisan dili taga-Sarangani Province, maong angay nga pahimuslan. Walay laing tinguha si Governor Steve Chiongbian Solon sa iyang Serbisyong Sarangan Community Outreach Program gipangunahan ni Program Manager Ms. Asma Akmad og sa Provincial Health Office nila Dr. Arvin Alejandro, municipal health officers og municipal chiefs of hospitals, kundili nga matabangan ang mga lumulupyo sa gihambin nilang balatian nga dili na makagasto pa, katugbang ang pribadong sektor, sa pagsuporta nila Senador Manny og Congressman Ruel Pacquiao, Vice Governor Elmer De Peralta, og ang tanang board member, municipal-barangay-purok officials.
