May posibilidad nga isa lang ang grupo sang New People’s Army (NPA) nga nagpang-ambush sa mga katapo sang Regional Force Battalion, sa una na nga nagluntad nga pagpang-atake sang rebelde nga grupo sa Maasin municipal police station kag sa engkwentro sa banwa sang Janiuay kag Sibalom, antique sang damlag lang.
Ini ang ginpahayag ni PSI Felix Alyansa ang hepe sang Maasin municipal police station.
Suno sa iya, nagalibot-libot lang ang grupo sa mabukid nga bahin sang banwa sang Maasin kag Janiuay kag nagalab-ot pa sa kabukiran nga sakop na sang probinsiya sang Antique.
Samtang ginsiling man sini nga tuman ka-sakit para sa hanay sang kapulisan nga sila ang ginahimo nga target sang rebelde nga grupo ilabi pa nga mahapos lang suno sa iya nga ma-pattern ang kapulisan.
Nahibaluan nga isa ang patay samtang 9 ang pilason sa nagluntad nga pagpang-ambush sang mga katapo sang NPA sa brgy. Bolo sa banwa sang Maasin, iloilo.
